İbrahim Kalın: "Moskva-Kiyev danışıqlarının bərpası mümkündür"

“Rusiya ilə Ukrayna arasında danışıqlar prosesinin dayandırılması gözlənilən idi, amma çox güman ki, tərəflər nə vaxtsa danışıqlar masasına qayıdacaqlar”.

Busaat.az xəbər verir ki, bu sözləri Türkiyə prezidenti Rəcəb Tayyib Ərdoğanın rəsmi sözçüsü İbrahim Kalın Rusiya və Ukrayna arasında danışıqların nə vaxtsa bərpa olunacağı barədə danışarkən deyib.

“Rusiya ilə Ukrayna arasında danışıqlar prosesinin dayandırılması gözlənilən idi, lakin çox güman ki, tərəflər nə vaxtsa danışıqlar masasına qayıdacaqlar. Sual olunur: Biz buna nə vaxt qayıdacağıq və o vaxta qədər nə qədər ziyan dəymiş olacaq? Şübhəsiz ki, bu, qismən Ukrayna ilə bağlıdır. Amma daha böyük məsələ həqiqətən Rusiya ilə Qərb dünyası arasında yeni razılaşmadır” -deyə, İbrahim Kalın Rusiya tərəfinin “Qərblə yeni sövdələşməyə” ümid etdiyini qeyd edib.

Xatırladaq ki, Ukrayna prezidenti Volodimir Zelenski daha əvvəl Milli Təhlükəsizlik və Müdafiə Şurasının Rusiya lideri Vladimir Putinlə danışıqların mümkün olmadığı barədə qərarını qüvvəyə mindirib.

Busaat.az