Bütün Rusiya bankları və bir sıra ölkələrdə 100-dən çox bank İranın SEPAM kimi tanınan maliyyə telekommunikasiya sisteminə qoşularaq beynəlxalq banklararası sistem SWIFT-ə ehtiyacı aradan qaldırıb.
Busaat.az xəbər verir ki, bunu İran Mərkəzi Bankının beynəlxalq məsələlər üzrə sədr müavini Möhsün Kərimi Tasnim agentliyinə bildirib.
Kəriminin sözlərinə görə, İran banklarının maliyyə əməliyyatlarını həyata keçirmək üçün artıq SWIFT-ə ehtiyacı yoxdur.
İran Mərkəzi Bankının sədr müavini qeyd edib ki, Rusiya üzrə bütün banklar, Rusiya banklarının SPS-ə (maliyyə mesajlaşma sistemi, SWIFT maliyyə köçürmə sisteminin Rusiya ekvivalenti) çıxışı olan digər ölkələrdəki bütün filialları və 13 ölkədəki Rusiya bankları SEPAM-a qoşulub.
O, əlavə edib ki, Rusiyanın SPFS-i İranın SEPAM-ı ilə əlaqəli olduğundan, Rusiya şəbəkəsinə çıxışı olan hər kəs indi İran banklarına və ya əksinə qoşula bilər.
Kərimiyə görə, SEPAM və SPFS arasında mesajlar SWIFT standartları əsasında göndərilir.
Qeyd edək ki, 2022-ci ilin oktyabrında Rusiyanın İrandakı ticarət nümayəndəsi Rüstəm Jiqanşin Rusiya və İran arasında beynəlxalq banklararası məlumat və ödəniş sisteminin (SWIFT) analoqunu işə salmağı planlaşdırdığını açıqlayıb.
Hazırda Rusiya ilə İran arasında ticarət-iqtisadi əlaqələr inkişaf edir. İran mediasına görə, 2022-ci ilin yanvar-iyul aylarında ikitərəfli ticarət illik müqayisədə 44,9% artaraq 2,8 milyard dollara çatıb.
