İran Almaniyanın Tehrandakı səfirini Xarici İşlər Nazirliyinə çağırıb

İran Almaniyanın Birləşmiş Millətlər Təşkilatının (BMT) İnsan Haqları Şurasındakı nümayəndələrinin bəyanatlarına cavab olaraq, ölkənin Tehrandakı səfirini Xarici İşlər Nazirliyinə çağırdığını bildirib.

Busaat.az xəbər verir ki, bununla bağlı İran Xarici İşlər Nazirliyinin internet saytında yazılı açıqlama yayımlanıb.

Açıqlamada Almaniyanın Tehrandakı səfiri Hans Udo Muzelin Almaniyanın (BMT) İnsan Haqları Şurasındakı nümayəndələrinin “müdaxiləçi və əsassız” ritorikasına cavab olaraq Xarici İşlər Nazirliyinə çağırıldığı bildirilib.

Almaniya səfirinə BMT-nin iclasında qəbul edilən qərarın “yanlış və siyasi” olduğu, İran administrasiyasının qəbul edilən qərarları rədd etdiyi və bu məsələdə Şura ilə əməkdaşlıq etməyəcəyi bildirilib.

Qeyd edək ki, BMT İnsan Haqları Şurasının noyabrın 24-də keçirilən xüsusi iclasında İranda sentyabrın 16-dan bəri davam edən etirazlar zamanı təhlükəsizlik qüvvələrinin müdaxiləsinin insanların hüquqların pozulmasına səbəb olması ilə bağlı iddialar müzakirə edilib.

İclasın sonunda iddia edilən hüquq pozuntularının araşdırılması üçün problemli məsələlərin İstintaq komissiyasına həvalə edilməsi haqqında qərar layihəsi 6 əleyhinə, 25 lehinə olmaqla səs çoxluğu ilə qəbul edilib.

Busaat.az