İran bu ilin sonuna qədər kosmosa ən azı 2 peyk buraxacaq

İran bu ilin sonuna kimi kosmosa ən azı iki peyk buraxacaq, digər peyklər isə buraxılış növbəsində qalacaq.

Busaat.az xəbər verir ki, bunu İranın rabitə və informasiya texnologiyaları naziri İsa Zarepur deyib.

Zarepur hazırlıq mərhələsində olan və ilin sonuna qədər orbitə buraxılması gözlənilən peyklərin “Nahid-1” və “Nahid-2” peykləri olduğunu bildirib.

Nahid peykləri İranın Kosmik Tədqiqatlar İnstitutu tərəfindən yaradılmış telekommunikasiya peykləridir. “Nahid-1” peyki 2015-ci ilin fevralında Kosmik Texnologiyalar Günü mərasimində təqdim edilib. O, ilk dəfə İran Kosmik Agentliyinin rəhbərliyi altında İran Kosmik Tədqiqatlar İnstitutunun Peyk Sistemləri Tədqiqat İnstitutunda layihələndirilib və inşa edilib.

“Nahid -2” peyki telekommunikasiya texnologiyasına malik, təkan sistemi ilə təchiz edilmiş, manevr və orbit korreksiyası qabiliyyətinə malik peyklərdən biridir və onu alçaq hündürlükdə telekommunikasiya sistemlərinin yaradılmasında mühüm addım hesab etmək olar.

İranlı nazir həmçinin qeyd edib ki, digər peyklər də orbitə buraxılmaq üçün hazırdır.

Tədqiqat və əməliyyat peyklərinin layihələndirilməsi və qurulması planına toxunan Zarepur əlavə edib ki, nazirliyin planlarından biri ilin sonuna qədər ən azı bu iki peykin səmaya buraxılmasıdır.

Busaat.az