İran dövlət televiziyası kiberhücuma məruz qalıb

İranın dövlət televiziyasında xəbər bülleteni yayımlanan zaman Ali dini lider Ayətullah Əli Xamneyinin çıxışı qəfil saxlanılıb və onun yerinə dünyasını dəyişən Məhsa Əmini və etirazlar zamanı həyatını itirən digər qadınların görüntüləri ekrana verilib.

Busaat.az xəbər verir ki, yaşanan hadisədə İran lideri Xamneyi hədəf göstərilib, eyni zamanda “Bizə qoşulun və ayağa qalxın” yazılan qısa videoda yayımlanıb. Videoada “qadın, həyat və azadlıq” şüarları səslənib.

Daha əvvəl İran hökumətinə qarşı kiberhücumlar həyata keçirən “Adalet-i Ali” adlı haker qrupu Twitter hesabında hücuma görə məsuliyyəti öz üzərinə götürüb.

Dövlət televiziyasının daha əvvəl də oxşar hücumlara məruz qaldığına işarə edən yarı-rəsmi İran Tələbə Xəbər Agentliyi (İSNA) telekanalın təhlükəsizliyinin təmin edilməsi üçün lazımi tədbirlərin görülməsi lazım olduğunu yazıb.

Qeyd edək ki, İran dövlət televiziyası əvvəllər də oxşar kiberhücuma məruz qalıb. Televiziyanın yanvar ayında yayımlanan efirində ölkədə terror təşkilatı sayılan Xalq Mücahidləri Təşkilatının rəhbərlərini tərifləyən məzmunlu video bir neçə saniyə ərzində ekranda yayımlanıb.