İran və Rusiya arasında enerji, gömrük və texnologiya sahələrində əməkdaşlığı nəzərdə tutan 2 saziş və 8 anlaşma memorandumu imzalanıb.
Busaat.az xəbər verir ki, İranın rəsmi xəbər agentliyi İRNA-nın məlumatına görə, nümayəndə heyəti ilə paytaxt Tehrana səfər edən Rusiya baş nazirinin müavini Aleksandr Novak İranın neft naziri Cavad Ovci ilə görüşüb.
Görüşdən sonra mətbuata açıqlama verən Ovci, Rusiya şirkətləri ilə enerji sahəsində çox yaxşı əlaqələrə malik olduqlarını ifadə edərək deyib: “Hazırda Rusiya şirkətləri İranda 7 neft sahəsinə sərmayə qoyur. Biz Rusiyanın digər 6 neft yatağının işlənməsində də razılaşdıq”.
İranın neft naziri bəyan edib ki, İran və Rusiya arasında 40 milyard dollarlıq əməkdaşlığı əhatə edən anlaşma memorandumu bir neçə ay ərzində imzalanacaq.
İran və Rusiya rəsmiləri arasında dünəndən bu yana davam edən danışıqlar barədə məlumat verən İranın neft nazirinin müavini Əhməd Esedzadə deyib ki, dünən İranın 100 şirkəti ilə Rusiyanın 80-dən çox şirkəti arasında görüşlər keçirilib.
Məlumata görə, sazişlər gömrük və ticarət sahələri ilə yanaşı, enerji əməkdaşlığını da əhatə edir.
Busaat.az
