İran və Taliban arasında su böhranı münasibətləri gərginləşdirir

İran parlamenti Əfqanıstandakı Taliban administrasiyasından “münasibətlərin daha da korlanmasının qarşısını almaq üçün” Hilmend çayındakı suyun İran tərəfinə axmasına icazə verməsini istəyib.

Busaat.az xəbər verir ki, İran parlamentinin açıq iclasında Tehran və Kabil arasında su problemi ilə bağlı bəyanat dərc olunub.

Sessiyada oxunan və 290 deputatdan 200-nün imzaladığı bəyanatda Talibana Hilmend çayında suyun paylaşılmasını ehtiva edən razılaşmanı yerinə yetirməyə çağırış edilib.

Əfqanıstanla sərhəddə yerləşən Sistan-Bəlucistan əyalətində “su böhranı”nın yaşandığı vurğulanan bəyanatda, “Su üç ay ərzində bölgəyə çatmasa, ölkənin şərqində humanitar fəlakətlə üzləşəcəyik”, – xəbərdarlığı edilib.

Digər tərəfdən İran Xarici İşlər Nazirliyinin sözçüsü Nasir Kənani dünən keçirdiyi mətbuat konfransında Əfqanıstan tərəfinin Taliban rəsmiləri ilə məsələ ilə bağlı danışıqlar zamanı müsbət və yeni addımlar atması və lazımi texniki tədbirlər görməsinə qərar verildiyini bildirib.

Busaat.az