İrandan İngiltərəyə "Şahzadə Harri"li CAVAB

İran Xarici İşlər Nazirliyi İngiltərə Xarici İşlər Nazirliyinin Əli Rza Əkbərinin edamı ilə bağlı açıqlamalarına cavab verib.

Busaat.az xəbər verir ki, Nazirlik şahzadə Harrinin 25 əfqanı öldürməsindən sonra səssiz qalan İngiltərənin insan haqları mövzusunda təbliğat aparacaq vəziyyətdə olmadığını vurğulayıb.

Xatırladaq ki, İranın keçmiş müdafiə nazirinin müavini, Britaniya və İran vətəndaşlığına malik Əli Rza Əkbəri ötən şənbə günü İranda edam edilib.

İran müdafiə nazirinin keçmiş müavini Əkbəri 2019-cu ildə “Böyük Britaniyaya casusluq” ittihamı ilə həbs edilib. Əkbəri ona qarşı irəli sürülən ittihamları rədd edib.

Ölüm hökmünün elan edilməsindən sonra İngiltərədən sərt reaksiya gəlib. Baş nazir Rişi Sunak deyib: “Edam barbar rejim tərəfindən törədilən həyasız, qorxaq hərəkətdir”.

İngiltərə Xarici İşlər Naziri Cleverly edamı pisləyib və səssiz qalmayacaqlarını bəyan edib.

Bu fikirlərə qarşı İran Xarici İşlər Nazirliyinin sözçüsü Nasir Kənaninin mövzu ilə bağlı açıqlaması bu gün nazirliyin rəsmi sosial media hesabında ingilis dilində paylaşılıb:

“İngiltərənin İran İslam Respublikasının milli təhlükəsizliyinə müdaxiləsi İran kəşfiyyat və məhkəmə sistemindən qəti cavab aldı. “Kral ailəsinin bir üzvünün 25 günahsız insanın öldürülməsinə görə peşman olmadığı Britaniya rejimi və bu müharibə cinayətinə məhəl qoymayanlar insan haqlarını təbliğ etmək iqtidarında deyillər”.