İranın neft naziri Cevad Ovci İran və Küveyt arasında illərdir münaqişəyə səbəb olan Fars körfəzindəki “Arəş” qaz yatağına dair hüquqlarının pozulmasına dözməyəcəklərini açıqlayıb.
Busaat.az xəbər verir ki, nazir ortaq qaz sahəsindəki problemlərlə bağlı verdiyi açıqlamada qeyd edib ki, İran həmişə qonşuları ilə sərhəd və dəniz məsələlərinin sülh yolu ilə həllini dəstəkləyir.
Ortaq neft və qaz yataqlarının istismarında hər zaman danışıqlar və qarşılıqlı anlaşma yolunu tutduqlarını ifadə edən Ovci ölkəsinin “Arəş” qaz yatağında birgə hərəkət etmək istədiyini bildirib.
“Əgər qarşılıqlı anlaşma və əməkdaşlıq istəyi olmasa, İran öz proqramına sözügedən mənbələrin işlədilməsi və tədqiqini daxil edəcək”, – nazir deyib.
Qeyd edək ki, Fars körfəzində yerləşən və 1967-ci ildə kəşf edilən Arəş/Durra Qaz Yatağı illərdir İran və Küveyt arasında problemlər yaradır. Qaz yatağının İran tərəfdəki hissəsi “Arəş”, Küveyt tərəfindəki hissəsi isə “Durra” adlanır.
Səudiyyə Ərəbistanı və Küveyt 2022-ci ilin martında Durra qaz yatağının işlənməsinə dair saziş imzalayıb.
İran isə sözügedən razılaşmanın “qanunsuz” olduğunu müdafiə edərək, bölgədə qazma işlərinə başlayacağını bəyan edib.
Busaat.az
