Türkiyənin Suriyanın şimalında PKK/YPG terror təşkilatına qarşı əməliyyatı beynəlxalq ictimaiyyətin gündəmindən düşmədiyi zamanda, İrandan mümkün quru əməliyyatı ilə bağlı yeni açıqlama gəlib.
Busaat.az xəbər verir ki, İranın Xarici İşlər naziri Hüseyn Əmir Abdullahyanın türk həmkarı Mövlud Çavuşoğlu ilə telefonla danışdığı və Türkiyənin Suriyada mümkün əməliyyatı ilə bağlı İranın narahatlığını çatdırdığı bildirilib.
İranın yarı-rəsmi xəbər agentliyi Tasnimin xəbərinə görə, Abdullahyan Tehranın Türkiyənin Suriya ilə bağlı təhlükəsizlik narahatlıqlarını anladığını, lakin hərbi əməliyyatın problemi həll etməyəcəyi fikrində olduğunu bildirib. Qeyd edilib ki, iranlı nazir Türkiyənin əməliyyatının vəziyyəti daha da çətinləşdirəcəyini vurğulayıb və məsələnin Ankara ilə Dəməşq arasında təhlükəsizlik danışıqları yolu ilə həllini istəyib.
Abdullahyan həmçinin bəyan edib ki, İran Türkiyə ilə Suriya hökuməti arasında siyasi problemlərin həlli ilə bağlı danışıqları dəstəkləməyə hazırdır. İran mətbuatı Çavuşoğlunun iranlı həmkarı ilə eynifikirləri bölüşdüyünü yazıb.
Qeyd edək ki, noyabrın 13-də suriyalı terrorçu Əhlam Əlbəşirin İstanbulun mərkəzi Taksim İstiqlal küçəsində 6 nəfərin ölümü, 81 nəfərin yaralanması ilə nəticələnən bombalı hücumundan sonra Ankara Suriyada PKK/YPG terror təşkilatına qarşı hava əməliyyatı keçirməyə başlayıb. Bundan sonra bölgədə quru əməliyyatının keçirilməsi barədə siqnallar verilib.
Busaat.az
