İranın xarici işlər naziri Moskvaya gəlib

İranın xarici işlər naziri Hüseyn Əmir Abdullahyan Moskvaya rəsmi səfərə gəlib.

Busaat.az xəbər verir ki, nazir gəlişindən sonra iranlı jurnalistlərlə qısa söhbət edib, Rusiyada danışıqlar zamanı qaldırmağı planlaşdırdığı məsələləri şərh edib.

“Lavrovla sabahkı müzakirələrimiz zamanı qaldırılacaq məsələlərdən biri JCPOA (İranın nüvə proqramı üzrə Birgə Hərtərəfli Fəaliyyət Planı) olacaq”, – Abdullahyan deyib:

“Rusiya Vyanada bir neçə ay davam edən 4+1 danışıqlarının yeni raundunda səmərəli rol oynadı. Rusiyalı həmkarlarımız tərəflərin danışıqlar masasına qaytarılması ilə bağlı öhdəliklərini yerinə yetirməkdə davam edirlər”.

Abdullahyanın Moskvaya səfəri yanvar ayına planlaşdırılsa da, tərəflər onun daha sonrakı tarixə təxirə salınması barədə razılığa gəliblər. Qaldırılacaq məsələlər arasında Rusiya, Türkiyə, İran və Suriya xarici işlər nazirlərinin müavinlərinin Dəməşq və Ankara arasında əlaqələrin yaxşılaşdırılmasına dair görüşünə hazırlıq da var. Bundan başqa, tərəflər Rusiyanın xarici işlər nazirinin daha əvvəl elan etdiyi Cənubi Qafqaz regionunda barışıq üzrə ikinci üç-üç görüşü, eləcə də Astana formatı çərçivəsində Suriyada barışıq səylərini müzakirə edəcəklər. Həmçinin nazirlərin Rusiyanın Ukraynadakı hərbi əməliyyatı ilə bağlı müzakirələri də istisna edilmir.

Rusiya Xarici İşlər Nazirliyinin sözçüsü Mariya Zaxarova danışıqlardan öncə bildirib ki, tərəflər İran və Səudiyyə Ərəbistanı arasında diplomatik əlaqələrin bərpası ilə bağlı daha əvvəl verilən açıqlama kontekstində Yaxın Şərqdəki vəziyyəti də müzakirə edəcəklər.

Busaat.az