İspaniyada turizmin yerli əhali üzərində yaratdığı mənfi təsirə qarşı etirazlar güclənir.
Busaat.az xəbər verir ki, bazar günü Barselonadakı məşhur Sagrada Familia bazilikasının qarşısında keçirilən aksiya zamanı fəallar turist avtobusunun qarşısını kəsib və su tapançaları ilə turistlərə simvolik etiraz ediblər. Etirazçılar “Turistlər, evə qayıdın!” şüarları səsləndirib və avtobusun üzərinə “Turist mərkəzli sistemə son” pankartı asıblar.
Aksiya iştirakçıları turizmin artmasının yerli sakinləri iqtisadi və sosial baxımdan təzyiq altında saxladığını bildiriblər. Etirazçılar qeyd ediblər ki, turizm prioritetli iqtisadi model bölgələrin yerli resurslarını sıradan çıxarır. Hərəkat nümayəndələri iyunun 15-də ölkə üzrə daha genişmiqyaslı aksiyaların keçiriləcəyini elan ediblər.
Qeyd edək ki, oxşar nümayişlər ötən il də baş vermişdi və minlərlə insan Barselona küçələrində yürüş edərək turistləri sakitliyə çağırmışdı.
Şövkət Əliyeva
Busaat.az
