İsrailin Cenin əməliyyatı zamanı yaralanan fələstinlilərin sayı 50-yə çatıb

İsrail Silahlı Qüvvələrinin İordan çayının qərb sahilinin Cenin şəhərindəki qaçqın düşərgəsində keçirdiyi əməliyyat zamanı yaralanan fələstinlilərin sayı 50-yə çatıb.

Busaat.az xəbər verir ki, bu barədə Fələstin Səhiyyə Nazirliyi bazar ertəsi bildirib.

Nazirliyin verdiyi məlumata görə,  yaralılardan 10-nun vəziyyəti ağırdır. Baş verən toqquşmalarda ən azı 9 fələstinli həlak olub.

Nazirlik dünən səhər saatlarında İsrail Silahlı Qüvvələrinin Cenin bölgəsinə hücumu zamanı 7 nəfərin öldüyünü, ən azı 27 nəfərin isə yaralandığını açıqlamışdı.

Qeyd edək ki, Fələstinin WAFA xəbər agentliyinin məlumatına görə, İsrail Hərbi Hava Qüvvələri bazar ertəsi gecəsi Cenindəki fələstinli qaçqın düşərgəsinə və yaxınlıqdakı əraziyə raket zərbələri endirib. Qısa müddət sonra İsrail qüvvələri düşərgəni mühasirəyə alaraq enerji təchizatını kəsib və yolları bağlayıb. Əl Ərəbiyyə telekanalının məlumatına görə, zirehli transportyorlar və tanklar da daxil olmaqla 200-dən çox zirehli texnika Cenin şəhərinə və qaçqın düşərgəsinə daxil olub.

Busaat.az