İsveçdə Quranı yandıran Rasmus Paludan HƏBS EDİLDİ

Yanvarda Türkiyənin Stokholm səfirliyi qarşısında Quranı yandıran Danimarkanın ifrat sağçı Stram Kurs Partiyasının lideri Rasmus Paludan üçün Malmö Prokurorluğu tərəfindən həbs qərarı çıxarıldığı bildirilib.

Busaat.az xəbər verir ki, İsveçin ən böyük qəzeti olan “Aftonbladet”in xəbərinə görə, müxtəlif şəxslər və Quranı təhqir etdiyi üçün “nifrət cinayəti” ilə məhkəməyə verilən danimarkalı ifrat sağçı siyasətçi Rasmus Paludan ifadə verməyə gəlmədiyi üçün Malmö Prokurorluğu onun barəsində həbs qərarı verib.

Qəzetə açıqlama verən Paludan deyib: “Ümumiyyətlə İsveç polisi və xüsusilə Malmö polisi məni qorumaq istəmir, ona görə də İsveçə gəlməyim təhlükəlidir. İsveçə gəlmək istəmirəm. İstəyirəm video formatda ifadə verim”.

Paludan haqqında qiyabi həbs qərarı çıxaran prokuror Adrian Combier Hogg Aftonbladet qəzetinə mövzu ilə bağlı açıqlama vermək istəmədiyini bildirib.

Qeyd edək ki, İstanbulun 2 saylı Vəkillər Kollegiyası yanvarın 21-də Türkiyənin Stokholm səfirliyi qarşısında Quranı yandıran Paludan haqqında aprelin 14-də Stokholm polisində cinayət işi qaldırıb.

Busaat.az