İyunun 1-də Kişinyovda keçiriləcək sammitdə Azərbaycanla sülh müqaviləsinin imzalanması nəzərdə tutulmayıb.
Busaat.az xəbər verir ki, bu barədə Sputnik Ermənistan-a Ermənistan Xarici İşlər Nazirliyinin mətbuat katibi Ani Badalyan məlumat verib.
“Ermənistanla Azərbaycan arasında münasibətlərin normallaşdırılması, xüsusən də “Sülh və dövlətlərarası münasibətlərin qurulması haqqında” saziş ətrafında müzakirələr davam edir. Dəfələrlə bildirdiyimiz kimi, Ermənistan tərəfi həll yollarının tapıldığı anda sazişi imzalamağa hazır olacaq”, – Badalyan deyib.
İrəvan ümid edir ki, problemlər ətrafında müzakirələr iyunun 1-də Kişinyovda planlaşdırılan görüşdə davam etdiriləcək.
“Kişinyovda keçiriləcək görüşün gündəliyində qeyd olunan sazişin imzalanması nəzərdə tutulmayıb”, – Badalyan bildirib.
Qeyd edək ki, Kişinyovda Ermənistan, Azərbaycan, Fransa, Almaniya liderlərinin və Avropa İttifaqı Şurasının rəhbərinin iştirakı ilə danışıqların aparılması planlaşdırılır.
Busaat.az
