KİV: "Ərdoğan Putinlə BMT-nin yeni şərtləri çərçivəsində taxıl sazişini müzakirə etməyi planlaşdırır"
Türkiyə prezidenti Rəcəb Tayyib Ərdoğan Rusiya lideri Vladimir Putinlə BMT-nin yeni şərtləri əsasında taxıl sazişinin həyata keçirilməsini müzakirə etməyi planlaşdırır.
Busaat.az xəbər verir ki, bu barədə Ankaradakı siyasət mənbəsi TASS-a bildirib.
“Əlbəttə, Soçidə keçiriləcək danışıqlarda əsas diqqət əvvəlki taxıl sazişinin həyata keçirilməsinə yönələcək. İki lider Türkiyənin iştirakı ilə Birləşmiş Millətlər Təşkilatı tərəfindən hazırlanmış yeni təklifləri hərtərəfli nəzərdən keçirəcək”, – mənbə deyib.
Bazar günü “Sabah” qəzeti yazıb ki, BMT-nin yeni təkliflər paketinə Avropada aktivləri dondurulmuş Rusiya qida istehsalçılarına qoyulan məhdudiyyətlərin aradan qaldırılması ilə bağlı danışıqların başlanması daxildir. Bundan başqa, Birləşmiş Millətlər Təşkilatı ammonyak boru kəmərlərinə dəymiş zərərin qiymətləndirilməsi üçün tədbirlər görülməsini təklif edir. Rusiya Kənd Təsərrüfatı Bankının (Rosselxozbank) SWIFT-ə yenidən qoşulması da BMT-nin son təklifləri sırasındadır.
BMT-nin baş katibi Antonio Quterreşin ofisi daha əvvəl bildirib ki, BMT rəhbəri Rusiya xarici işlər naziri Sergey Lavrova taxıl sazişinin uzadılması ilə bağlı təkliflər verən məktub göndərib.
Putin və Ərdoğan həmçinin Rusiyanın təbii qaz təchizatını müzakirə edə bilərlər.
“Ərdoğan-Putin görüşündə prioritet olacaq taxıl müqaviləsi ilə yanaşı, Rusiya təbii qazının Türkiyə üzərindən Avropaya nəqli müzakirə oluna bilər.
Rusiya prezidenti ilə türkiyəli həmkarı arasında Soçidə keçiriləcək danışıqlarda Qətərin köməyi ilə Rusiyanın Türkiyə üzərindən Afrikaya taxıl ixracı müzakirə olunacaq.
“Rusiyanın Qətərin maliyyə dəstəyi ilə Türkiyə üzərindən ən ehtiyacı olan Afrika ölkələrinə taxıl tədarükü prezident Ərdoğan və prezident Putinin gündəmindədir”, – mənbə bildirib.
