Kreml: “Ukraynada silah istehsalı münaqişənin həllinə mane olur”

Ukrayna torpaqlarında silah istehsalı müəssisələrinin yerləşdirilməsi münaqişənin nizamlanması səylərinə mane olacaq.

Busaat.az xəbər verir ki, bu barədə Kremlin mətbuat katibi Dmitri Peskov bildirib.

“Ukraynada silah istehsalı sahələrinin yerləşdirilməsi, şübhəsiz ki, gərginliyin azaldılmasına və Ukrayna ətrafında münaqişənin nizamlanmasına töhfə verməyəcək. Britaniyanın qərarı vəziyyəti əsaslı şəkildə dəyişdirə bilməz. Bu, həmçinin xüsusi hərbi əməliyyatın əvvəlcədən müəyyən edilmiş uğurla yerinə yetirilməsinə və başa çatdırılmasına heç bir şəkildə təsir göstərə bilməz”, – Peskov vurğulayıb.

O, bildirib ki, Moskva Londonun addımlarını mənfi qəbul edir.

“Və, əlbəttə ki, bu silahlar bizə qarşı istifadə olunarsa, ordumuz üçün xüsusi diqqət mərkəzində olacaq”, – Peskov bildirib.

Ukrayna prezidenti Volodimir Zelenski bir müddət əvvəl Britaniyanın ən böyük müdafiə şirkəti BAE Systems-in baş direktoru Çarlz Vudbern ilə görüşdüyünü və britaniyalı silah istehsalçısının Ukraynada fəaliyyətə başlayacağını açıqladığını deyib.