Rusiya Ermənistan vasitəsilə Cənubi Qafqaz regionunda NATO ölkələrinin maraqlarını təşviq etmək cəhdlərindən xəbərdardır.
Busaat.az xəbər verir ki, bu barədə Rusiya xarici işlər naziri Sergey Lavrov bildirib.
“Anti-Rusiya münasibətlərinin kəskinləşməsinə gəlincə, bu, əhəmiyyətli dərəcədə süni şəkildə həyata keçirilir. Biz Ermənistanda son illərdə yaradılan qeyri-hökumət təşkilatlarının çoxluğundan xəbərdarıq və ondan əvvəl də onların sayı kifayət qədər idi. Bu təşkilatlar Ermənistanla Rusiya Federasiyası arasında dostluq münasibətlərini inkişaf etdirmək üçün yaradılmır. Tam əksinə, onların məqsədi anti-Rusiya əhval-ruhiyyəsi üçün zəmin yaratmaq və Ermənistandan kanal kimi istifadə edərək bu regionda ilk növbədə ABŞ, Aİ və NATO maraqlarının təşviqinə hazırlamaqdır. Biz bu cəhdləri görürük və onlar müəyyən nəticələr əldə edirlər”, – rusiyalı diplomat söylərib.
Lavrov vurğulayıb ki, Rusiya erməni xalqının böyük əksəriyyətinin ölkənin Rusiya Federasiyası ilə ənənəvi, tarixən qardaşlıq əlaqələrinin inkişafında maraqlı olduğuna dərin əmindir.
“Və qeyd etmək istəyirəm ki, bir neçə gün əvvəl Ermənistanın baş naziri Nikol Paşinyan mətbuat konfransında Ermənistanın geosiyasi istinad nöqtələrini dəyişmədiyini açıq şəkildə söylədi. Ümid edək ki, İrəvanı başqa istiqamətə çəkmək cəhdlərinə baxmayaraq, bu mövqe qalib gələcək”, – Lavrov əlavə edib.
