Livanda vəba xəstəliyindən həyatını itirənlərin sayı 14-ə yüksəlib.
Busaat.az xəbər verir ki, bu barədə Livan Səhiyyə Nazirliyi ölkədə ilk dəfə oktyabrın 6-da qeydə alınan və şimal bölgələrində yayılan vəba ilə bağlı yeni məlumatları paylaşıb.
Nazirlikdən verilən açıqlamada daha 4 nəfərin vəba xəstəliyindən həyatını itirdiyi, 110 yeni yoluxma faktının aşkarlandığı bildirilib.
Beləliklə, ölkədə vəba səbəbindən ümumi insan itkisi 14-ə, yoluxma sayı isə 913-ə yüksəlib.
Livanın Səhiyyə Nazirliyi oktyabrın 6-da bildirib ki, ölkədə 1993-cü ildən bəri ilk dəfə vəba xəstəliyi qeydə alınıb. Ölkədə vəbadan ilk ölüm oktyabrın 12-də baş verib.
Səhiyyə naziri Firas Abyad oktyabrın 19-da verdiyi açıqlamada vəba xəstəliyinin yayılmasına səbəb kimi içməli suyun verildiyi mənbələrdəki çirklənməni göstərib.
Busaat.az
