Venesuela prezidenti Nikolas Maduro Marakaibo gölü döyüşünün 200-cü ildönümünə həsr olunmuş hərbi dəniz paradında iştirak edən Rusiya Hərbi Dəniz Qüvvələrinə məxsus “Perekop” təlim gəmisini ziyarət edib.
Busaat.az xəbər verir ki, bunu Rusiyanın Venesueladakı müvəqqəti işlər vəkili Eduard Sokolov TASS-a bildirib.
“Maduro Venesuelanın müdafiə naziri Vladimir Padrino Lopezin müşayiəti ilə, silahlı qüvvələrin bütün bölmələrinin rəisləri və Karakas meri Karmen Melendez ilə birlikdə gəmimizi ziyarət edib”, – Sokolov deyib.
Gəminin göyərtəsindəki təntənəli dəstədə Rusiyanın və Venesuelanın himnləri səsləndirilib.
Maduro, Venesuela və Rusiyanın həmişə bir yerdə olacaqlarını vurğulayıb.
Qeyd edək ki, Perekop gəmisi Sankt-Peterburq Hərbi Dəniz İnstitutunun, Admiral Naximov adına Ali Dəniz Məktəbinin və Hərbi Dəniz Politexnik İnstitutunun kursantları ilə birlikdə Kronştadtdan Kubaya keçərək paradda iştirak etmək üçün Marakaibo gölünə gəlib.
Busaat.az
