Fransa Avropa ərazisi üçün təhlükə yaradan silahların məhdudlaşdırılması ilə bağlı yeni razılaşmaların əldə olunmasını zəruri hesab edir.
Busaat.az TASS-a istinadən xəbər verir ki, bu barədə Fransa prezidenti Emmanuel Makron Fransa səfirlərinin illik konfransında bildirib.
Onun fikrincə, Ukraynadakı münaqişədə bütün növ silahlar və hərbi fəaliyyətlər Avropaya aiddir.
“Bizim bu gələcək sazişlərin konsepsiyasının müəllifi olmaq və onlara imza atmaq üçün iradə gücümüz olmalıdır”, – Makron bildirib.
Bununla bağlı Makron 2019-cu ildə “Avropa dünya siyasətində aktyor deyil, hədəfə çevrilib” deyərkən, orta və qısa mənzilli raketlər və strateji silahlar haqqında sazişlər kontekstində dediyi öz bəyanatlarını xatırladıb. O, bildirib ki, Avropa ölkələrinin imzalamadığı müqavilələrə əməl olunması dayandırıldığı üçün Avropa baş verənlərə təsir etmək şansı olmadan iki od arasında qalıb.
Makron Fransanın yeni ittifaqda çərçivə dövləti rolunu oynayacağı yeni dünya nizamını qurmaq arzusunu bəyan edib. O, Avropanın texnoloji muxtariyyətini və təhlükəsizlik baxımından müstəqilliyini gücləndirməyə çağırıb. Fransa lideri həmçinin əmin edib ki, avropalılar arasında artan koordinasiya NATO-nu pozmayıb, əksinə tamamlayır və gücləndirir. O, həmçinin Avropaya zamanla kosmos və rəqəmsal sektorları əhatə edəcək yeni tərəfdaşlıqlar qurmağa təklif edib.
