Mali, Burkina Faso Nigerə hərbi müdaxiləni müharibə elanı kimi qiymətləndirəcək

Burkina Faso və Mali Nigerə istənilən hərbi müdaxiləni onlara qarşı müharibə elanı kimi qiymətləndirəcək.

Busaat.az xəbər verir ki, bu barədə AFP xəbər agentliyi məlumat yayıb.

“Nigerə qarşı istənilən hərbi müdaxilə Burkina Faso və Maliyə qarşı müharibə elanı kimi qiymətləndiriləcək”, – məlumatda deyilir.

İyulun 26-da Nigerdə üsyançılar milli televiziya vasitəsilə prezident Məhəmməd Bazumun devrilməsi, respublikanın sərhədlərinin bağlanması, komendant saatı, konstitusiyanın fəaliyyətinin dayandırılması və siyasi partiyaların fəaliyyətinin qadağan olunduğunu elan ediblər.

İyulun 28-də isə onlar general Abdurahmane Tchiani-nin dövlət başçısı olduğunu açıqlayıblar.

Qeyd edək ki, Niger dünyanın yeddinci ən böyük uran istehsalçısıdır. Fransa KİV-lərinin məlumatına görə, Fransada elektrik enerjisi istehsal etmək üçün istifadə olunan uranın 15-17%-i Nigerin payına düşür.

Busaat.az