Meksikada narkotik karteli bir şəhəri mühasirəyə aldı

Meksikada narkotik karteli Apatzinqan şəhərinin giriş-çıxışını avtomobillərlə bağlayıb.

Busaat.az xəbər verir ki, Meksikanın ən şiddətli hərəkətlərinin yaşandığı ştatlardan biri olan Miçoakanda narkotik karteli Apatzinqan şəhərinin giriş-çıxışını bağlayıb.

Kartelin üzvləri avtobus və yük maşınlarını yolun ortasında saxlayaraq şəhərə giriş-çıxışları tutublar. Adının açıqlanmasını istəməyən yük maşını sürücüsü bildirib ki, dəstə üzvləri ondan avtomobilini yolun o biri tərəfində saxlamağı xahiş ediblər və hərəkət edərsə, onu yandıracaqları ilə hədələyiblər.

Digər tərəfdən, kartelin silahlı üzvləri bir ailənin avtomobilini zorla ələ keçirib. Toqquşmaların baş verdiyi əraziyə gedən silahlılar orada bir nəfəri qətlə yetiriblər.

Qeyd edək ki, “Qaynar zona” kimi tanınan Apatzinqan Meksikada cinayətkar dəstələrin sığındığı, narkotik istehsalı və daşınmasının həyata keçirildiyi mərkəz kimi tanınır. Şəhərdə uzun müddətdir ki, Viaqras narkotik karteli də fəaliyyət göstərir.

Busaat.az