İtaliyanın baş naziri Giorgia Meloni Rusiya ilə müharibənin davam etdiyi Ukraynanın paytaxtı Kiyevə gedəcəyini bəyan edib.
Busaat.az xəbər verir ki, bu barədə İtaliyanın ANSA agentliyi məlumat yayıb.
Məlumata görə, ölkədə sentyabrın 25-də keçirilən ümumi seçkilərdən sonra oktyabrın 22-də vəzifəsinin icrasına başlayan Meloni ilin ilk mətbuat konfransını keçirib.
Meloni fevralın 24-dən, yəni Ukrayna-Rusiya müharibəsinin ildönümündən əvvəl Kiyevə gedəcəyini açıqlayıb.
Ukrayna prezidenti Volodimir Zelenski ilə telefon danışığına toxunan Meloni deyib ki, o, Kiyevə gedəcəyini Zelenskiyə də deyib.
Görüş zamanı Meloni bəyan edib ki, İtaliya sülh prosesinin təminatçısı olmağa hazırdır və buna görə də fevralın 24-dən əvvəl Kiyevə getmək niyyətindədir və bu istiqamətdə addımların atıla biləcəyinə inanır.
Sülhün tərəfdarı ola biləcək hər şeyin tərəfində olduğuna işarə edən Meloni əlavə edib: “Ancaq açıq şəkildə bilməliyik ki, sülh yalnız istəyərək əldə edilə bilməz. Sülh üçün konkret addımlar atmaq lazımdır”.
Meloni qeyd edib ki, sülh istəyərkən Ukraynanın müstəqilliyinə və ərazi bütövlüyünə hörmətlə yanaşılacaq.
