Meymunçiçəyi Təşvişi: Ölkədə 12 Günlük Karantin Rejimi Tətbiq Edildi

Pakistanın şimal-qərbində yerləşən Hayber-Paxtunxva əyalətinin Bacur bölgəsində meymunçiçəyi virusu hallarının artması səbəbilə 12 günlük qapanma elan edilib.

Busaat.az bu barədə ölkə mediasına istinadla xəbər verir.

Rəsmi məlumatlara əsasən, son 3 ildə bölgədə 17 meymunçiçəyi halı aşkarlanıb və onların əksəriyyəti virusun yayıldığı ölkələrdən gələn şəxslərlə əlaqəli olub.

Bacur rayon rəhbərliyi virusun yayılmasının qarşısını almaq məqsədilə bütün giriş və çıxış nöqtələrini bağlayıb. Qapanma müddətində yalnız əsas xidmətlər – bazarlar, apteklər, mağazalar və təcili tibbi yardım mərkəzləri fəaliyyət göstərəcək.

Rəsmilər qeyd ediblər ki, qapanma qaydalarını pozan şəxslərə qarşı hüquqi tədbirlər görüləcək. Əhali qapalı məkanlarda qalmağa, səhiyyə işçiləri ilə əməkdaşlıq etməyə və sağlamlıq təhlükəsizliyi qaydalarına riayət etməyə çağırılıb.

Əyalət Səhiyyə İdarəsi isə şübhəli halların sürətli aşkarlanması və izolasiya olunması üçün xüsusilə giriş məntəqələri və tibb müəssisələrində müşahidə tədbirlərini gücləndirib.