Moldovada Aİ-yə üzvlük mitinqində minlərlə insan iştirak edib

Moldovanın paytaxtı Kişinyovda Avropa İttifaqına (Aİ) üzv olmaq məqsədi ilə mitinq keçirilib.

Busaat.az xarici mediaya istinadən xəbər verir ki, Moldovanın paytaxtı Kişinyovda Böyük Millət Məclisi meydanında keçirilən mitinqə Moldova Prezidenti Maya Sandu, Avropa Parlamentinin (AP) sədri Roberta Metsola və minlərlə insan qatılıb.

Sandu çıxışında Rumıniya, İtaliya, Fransa, İngiltərə və İspaniyada yaşayan Moldova vətəndaşlarının da aksiyalar keçirməsinə diqqət çəkib.

Ölkəsinin 2030-cu ilə qədər Aİ-yə üzv olmağı hədəflədiyini bildirən Sandu “Avropa kəndi” proqramına başladıqlarını və bir il ərzində 100 layihə həyata keçirdiklərini bildirib.

Sandu deyib:

“Moldovalılar avropalıdırlar, Moldovanın yeri Aİ-dədir. Bu yolda Aİ-nin dəstəyi var və Moldova xalqı da bunu istəyir. Bu, uzun və tələbkar bir yoldur və bütün cəmiyyətin bu istiqamətdə işləməsi lazımdır. Amma bu uşaqlarımız üçün dinc və sabit bir yoldur. Biz Moldovanın inkişafı üçün yeganə şans olduğuna görə bu yolu seçmişik. Bu, ölkəmizin Avropa sərhədlərində, şantaj altında qalmaması üçün seçdiyimiz yoldur”.

Ukraynada müharibənin davam etdiyinə diqqət çəkən Sandu əlavə edib: “Bu gün müharibə moldovalıların evlərindən uzaqda gedir. Çünki ukraynalılar torpaqları və xalqları üçün qəhrəmancasına döyüşür və canlarını verirlər. Bu müharibə bizə sübut edir ki, Kreml tərəfindən şantaj olunmaq istəmirik. Ölkəmizi və uşaqlarımızı müharibə təhlükəsindən qorumaq istəyirik. Aİ üzvü olanda tək qalmayacağıq, təhlükəsiz və dinc olacağıq”.

Busaat.az