Moldovalıların əksəriyyəti NATO-ya üzv olmaq fikrinə qarşıdır - Maya Sandu

Moldova vətəndaşlarının əksəriyyəti ölkənin neytrallıqdan əl çəkərək NATO-ya qoşulması ideyasına qarşıdır.

Busaat.az xəbər verir ki, bu sözləri Moldova prezidenti Maya Sandu deyib.

“Xalq bunu istəməlidir, çünki bu, konstitusiyaya dəyişiklik deməkdir və referendum yolu ilə edilməlidir. Lakin bu gün rəy sorğularına baxsaq, neytrallıqdan imtina ideyasına ciddi dəstək verilmədiyini görürük”, – Sandu bildirib.

O, əlavə edib ki, Ali Təhlükəsizlik Şurasından başqa ölkədə informasiya manipulyasiyası və təbliğatına qarşı mübarizə aparan daha bir qurum yaradılacaq.

Sorğular göstərir ki, moldovalıların 55%-dən çoxu ölkənin NATO-ya üzvlüyünün qəti əleyhinədir, 27%-i isə bu təşəbbüsü dəstəkləyir. Bununla belə, Sandu əvvəllər Ukrayna böhranı fonunda Kişinyovun neytrallıqdan əl çəkə və hərbi alyansa qoşula biləcəyini istisna etməyib. O, həmçinin Moldova ordusunun yenidən silahlanmasında NATO ilə əməkdaşlığın genişləndirilməsində maraqlı olduğunu bildirib.

Busaat.az