NATO Qara dəniz boğazlarında Türkiyəyə təzyiqi artırıb

NATO Ankaranın boğazların idarəsi ilə bağlı Montrö Konvensiyasına qətiyyətlə riayət etməsinə yenidən baxması üçün Türkiyəyə təzyiqlərini artırıb.

Busaat.az xəbər verir ki, bunu Türkiyənin millət vəkili Ahmet Berat Conkar deyib.

“Aydınlıq” qəzeti hakim Ədalət və İnkişaf Partiyasının deputatı Ahmet Berat Conkardan sitat gətirib: “Son vaxtlar NATO alyansın Qara dənizdəki mövcudluğuna görə Türkiyəyə təzyiqlərini artırdı. Alyans Türkiyənin Montrö Konvensiyasının müddəalarına ciddi əməl etməsindən narazıdır”.

Conkarın sözlərinə görə, Türkiyə parlamentinin nümayəndə heyəti ABŞ-a son səfəri zamanı artan təzyiqlərlə üzləşib.

“ABŞ generalları və diplomatları Qara dənizə xüsusi diqqət yetirdilər. Bu, Rusiyanın Qara dəniz hövzəsində artan hökmranlığından, Qara dənizin “Rusiya gölünə” çevrilməsindən narahatlıq kimi başa düşüldü” – deyə, türkiyəli deputat bildirib.

Qeyd edək ki, Türkiyənin müxtəlif hökumət rəsmiləri dəfələrlə vurğulayıb ki, ölkə Montrö Konvensiyasına istinad edərək, Rusiyanın Ukraynada xüsusi hərbi əməliyyatı başlayandan bəri bütün hərbi gəmilərin Bosfor və Çanaqqala boğazları vasitəsilə Qara dənizə çıxışına qadağa qoyub. Ankara bildirib ki, bununla Türkiyə Qara dəniz hövzəsində hərbi eskalasiyanın qarşısını ala bilib.

Busaat.az