NATO Türkiyəyə “yarıdaimi” sığınacaqlar göndərir

NATO müttəfiqləri “əsrin fəlakəti” olaraq adlandırılan Türkiyədə baş vermiş zəlzələdən zərər çəkənləri yerləşdirmək üçün tam hüquqlu “yarıdaimi” sığınacaqlar göndərməyə qərar verib.

Busaat.az xəbər verir ki, göndəriləcək sığınacaq obyektləri normal olaraq NATO-nun təlim və əməliyyatlarında istifadə olunan qərargah komplekslərindən ibarət olacaq. Bu obyektlərə istilik, generator və müalicə sahələri kimi digər obyektlər daxildir.

NATO rəsmiləri hazırda İtaliyanın Taranto şəhərində yerləşən NATO Dəstək Agentliyinin Cənub Əməliyyatlar Mərkəzində saxlanılan sığınacaq obyektlərinin daşınması üçün ən uyğun logistika və nəqliyyat variantlarını nəzərdən keçirirlər.

Bölmələrin göndərilməsinə NATO-nun Avropadakı Müttəfiq Qüvvələrinin Ali Baş Komandanı (SACEUR) general Kristofer Kavoli  rəhbərlik edəcək.

NATO-nun baş katibi Yens Stoltenberq müttəfiqlərin qərarını alqışlayıb: “NATO müttəfiqimiz Türkiyə ilə güclü həmrəylik içərisindədir. Bu sığınacaq obyektlərinin təhvil verilməsi insanların həyatını xilas edəcək. NATO müttəfiqləri və tərəfdaşları ehtiyacı olanlara kömək etmək üçün əllərindən  gələni etməyə davam edəcək”.

Busaat.az