NATO xarici işlər nazirləri Çini müzakirə edəcək

NATO ölkələrinin xarici işlər nazirləri Rumıniyanın paytaxtı Buxarestdə keçirilən görüşlərinin ikinci günündə Çinlə əlaqələr və terrorla mübarizə kimi məsələləri müzakirə edəcək.

Busaat.az xəbər verir ki, günün ilk iclası Çinlə münasibətlərə həsr olunub.

Məlumata görə, NATO Çini rəqib kimi görmür, lakin onun hərbi xərclərindən və nüvə kimi silahların müxtəlifliyinin artmasından, təsir dairəsini genişləndirmək səylərindən və son illərdə Rusiya ilə münasibətlərindən narahatdır.

Əsas iqtisadi və kommersiya tərəfdaşı kimi Çinlə münasibətlərin davam etdirilməsinin vacibliyinə diqqət çəkən NATO, Çinin Ukraynadakı müharibə ilə bağlı Rusiyaya təsir imkanlarından istifadə edə biləcəyini qiymətləndirir.

NATO-nun nazirlər toplantısının bugünkü digər sessiyasında “Rusiyanın təzyiqinə məruz qalan tərəfdaşlar” müzakirə olunacaq. Bosniya və Herseqovina, Moldova və Gürcüstanın xarici işlər nazirləri bu sessiyada NATO ölkələrinin nazirlərinə qatılacaqlar.

Bu görüşlərdə NATO Balkan ölkələrində və ya Ukraynadan sonra digər ölkələrdə qeyri-sabitliyin qarşısının alınmasının vacibliyini vurğulayır.

NATO Xarici İşlər Nazirləri Toplantısının sessiyalarında üzvlüyə namizəd ölkələr Finlandiya və İsveç də iştirak edir.

Qeyd edək ki, iclasın dünənki hissəsində Rusiya ilə müharibə vəziyyətində olan Ukraynaya yardım məsələsi müzakirə olunub.

Busaat.az