Netanyahu Səudiyyə Ərəbistanı ilə diplomatik əlaqələr quracağını vəd edir

İsraildə baş nazirliyə namizəd Benyamin Netanyahu vəzifəyə gəldikdən sonra Səudiyyə Ərəbistanı ilə tam diplomatik əlaqələr quracağına söz verib və bunun həm də fələstinlilərlə sülhə kömək edəcəyini deyib.

Busaat.az xəbər verir ki, Netanyahu, həmçinin, fələstinlilərlə pərdəarxası sülh danışıqlarını bərpa etməyə hazır olduğunu bildirib.

Əl-Ərəbiyyə xəbər agentliyində yer alan şərhlər görə, bu açıqlamalar Netanyahunun formalaşdırdığı ifrat sağçı hökumətlə bağlı qorxuları aradan qaldırmaq məqsədi daşıyıb.

İsrail uzun müddətdir İrana qarşı ortaq düşmənçiliyinə əsaslanaraq Səudiyyə Ərəbistanı ilə pərdəarxası təmasları artırmaq istəyir. Amma səudiyyəlilər bildiriblər ki, tam diplomatik münasibətlər yalnız 1967-ci ildə Yaxın Şərq müharibəsində İsrailin işğal etdiyi ərazilərdə müstəqil Fələstin dövləti yaradıldıqdan sonra qurulacaq.

Netanyahu deyib ki, o, fələstinlilərlə danışıqlar yolu ilə sülh əldə etməyə çalışacaq. Lakin o, iki dövlətli həlli dəstəkləməkdən imtina edib, əvəzində “təzə baxış” və yaradıcı düşüncəyə çağırıb.

Noyabrın 1-də keçirilən seçkilərdə Netanyahu və bir qrup ifrat sağçı və ultra-pravoslav dini partiyalar İsrail parlamentində yerlərin əksəriyyətini qazanaraq yeni hökumət qurmaq imkanı qazanıb.

Netanyahunun hökuməti formalaşdırmaq üçün dekabrın 21-nə qədər vaxtı var.

Busaat.az