Nigeriyada 14 ildə 23 mindən çox insan itkin düşüb

Terror hadisələrinin baş verdiyi Nigeriyanın şimal-şərqində 14 ildir ki, davam edən hadisələr səbəbindən 23 mindən çox insan itkin düşüb.

Busaat.az xəbər verir ki, bu barədə Amnesty International (AI) və Allamin Fondunun Nigeriya direktoru İsa Sanusi bildirib.

Mənbənin sözlərinə görə, Boko Haram terror təşkilatının şimal-şərq bölgəsində artan hücumları nəticəsində minlərlə insan itkin düşüb.

Bölgədə 14 ildə baş verən terror hadisələri səbəbilə 23 mindən çox itkin düşmə faktının aşkar edildiyini bildirən Sanusi hökumətin bu itmələrə qarşı səssiz qaldığını deyib.

Sanusi hökumətin bu hadisələr qarşısında susması ilə bağlı kampaniyalarını daha da gücləndirəcəklərini bildirib.

Nigeriyada 2000-ci illərin əvvəllərindən bəri mövcud olan Boko Haramın həyata keçirdiyi kütləvi zorakılıqlarda on minlərlə insan həyatını itirib.

Təşkilat 2015-ci ildən ölkənin sərhəd qonşuları Kamerun, Çad və Nigerdə ​​də hücumlar həyata keçirir.