Nigeriyada 83 min Boko Haram və ISWAP üzvü təslim oldu

Nigeriyanın şimal-şərqində bir il ərzində 83 min terror təşkilatı Boko Haram və ISWAP üzvü təslim olub.

Busaat.az xəbər verir ki, terrorçuluğa qarşı “Hadin Kai” əməliyyatının komandanı general-mayor Kristofer Musa 2021-ci ilin iyulundan bu yana ölkənin şimal-şərqində Boko Haram və ISWAP-dan təxminən 83 min terrorçunun təslim olduğunu bildirib.

Bu rəqəmin 41 mininin uşaq olduğunu qeyd edən Musa, “Terrorçular öz uşaqları ilə yeni bir terror qruplaşması yaratmağa çalışırdılar və bu, baş tutsa çox təhlükəli olardı” – deyə, Musa bildirib.

Son illərdə təşkil edilən əməliyyatlara baxmayaraq, təşkilat hələ də Nigeriyada ciddi təhlükəsizlik problemi yaradır.

Nigeriyada 2009-cu ildən bəri Boko Haramın törətdiyi kütləvi terror aktlarında 20 mindən çox insan həlak olub.

Terror təşkilatı 2015-ci ildən Nigeriyanın qonşuları Kamerun, Çad və Nigerdə ​​də hücumlar həyata keçirir. Təşkilatın Çad gölü hövzəsində təşkil etdiyi hücumlarda ən az 2000 insan həyatını itirib.

Terror aktları və münaqişələr səbəbindən ölkədə yüz minlərlə insan miqrasiya etmək məcburiyyətində qalıb.

Busaat.az