Nigeriyada ABŞ konvoyuna hücum nəticəsində ölənlərin sayı 7-yə çatdı

Nigeriyanın cənub-şərqində Anambrada ABŞ diplomatik konvoyuna təşkil edilən silahlı hücumda 2 nəfərin itkin düşdüyü, can itkisinin 7-yə yüksəldiyi açıqlanıb.

Busaat.az xarici mediaya istinadən xəbər verir ki, mayın 16-da Nigeriyanın cənub-şərqindəki Anambra əyalətində ABŞ konvoyuna silahlı hücum nəticəsində ölənlərin sayı artıb.

Anambra Əyalətinin Polis rəisi Echeng Echeng keçirdiyi mətbuat konfransında sözügedən hücumda can itkisinin 7-yə yüksəldiyini açıqlayıb və 2 nəfərin itkin düşdüyünü bildirib. Ölənlər arasında ABŞ vətəndaşlarının olmadığını qeyd edən Echeng, hücumun böyük ehtimalla terror təşkilatı Biafranın Yerli İnsanları (IPOB) tərəfindən təşkil edildiyini bildirib.

Hücumdan sonra bölgəyə təhlükəsizlik qüvvələrinin göndərildiyini bildirən Echeng, hücum edənlərin bölgəyə gələn təhlükəsizlik qüvvələri ilə də toqquşduğunu və meşəlik sahəyə qaçaraq izlərini itirdiklərini açıqlayıb.

Busaat.az