Nigeriyada silahlı hücum: 21 nəfər həyatını itirdi
Nigeriyada zaman-zaman dini qarşıdurmaların yaşandığı Plato əyalətində silahlı hücum nəticəsində 21 nəfər həyatını itirib.
Busaat.az xəbər verir ki, bu barədə Plato Dövlət Mərkəzinin rəhbəri Solomon Muantiri məlumat yayıb.
O, bildirib ki, səhər saatlarda Plato əyalətinin Barkin Ladi bölgəsinə gələn silahlı şəxslər hücumu təşkil edib.
“Hücum zamanı həyatını itirən 21 nəfər bu gün günortadan sonra dəfn edildi. Kütləvi dəfn mərasimindən yeni qayıtdıq”,- Muantiri bildirib.
Xüsusi Hərbi Əməliyyat Qrupu Yaylasının sözçüsü kapitan Ola Ceyms bölgəyə əsgərlərin göndərildiyini və vəziyyətin nəzarət altında olduğunu söyləyib.
Qeyd edək ki, Nigeriyanın Plato əyalətində vaxtaşırı müsəlmanlarla xristianlar arasında zorakılıqlar baş verir. Ötən ay ştatda keçirilən əməliyyatlar zamanı 130 qanunsuz silah ələ keçirilib.
