ABŞ Konqresinin Nümayəndələr Palatası Covid-19-un mənşəyi ilə bağlı kəşfiyyat məlumatlarının ictimaiyyətə açıqlanmasını tələb edən qanun layihəsini qəbul edib.
Busaat.az xarici mediaya istinadən xəbər verir ki, ABŞ Konqresinin Nümayəndələr Palatası ABŞ kəşfiyyatının COVID-19 pandemiyasının mənşəyi ilə bağlı məxfiliyini ləğv edən qanun layihəsini yekdilliklə təsdiqləyib və prezident Co Baydenə göndərib.
Məlumata görə, qanun layihəsində Covid-19 epidemiyasının Wuhan Virusologiya İnstitutundan qaynaqlandığına inanmaq üçün əsaslı detallar yer alıb. Qanun layihəsində, həmçinin Wuhan İnstitutunun tədqiqatçıları haqqında məlumatların paylaşılması istənilib.
ABŞ Energetika Nazirliyinin Ağ Evə və Konqresin əsas üzvlərinə təqdim etdiyi məxfi kəşfiyyat hesabatına görə, Covid-19 epidemiyasının Çindəki bir laboratoriyadan təsadüfən sızdığı düşünülür.
FTB direktoru Kristofer Rey fevralın 28-də deyib: “Büro pandemiyanın mənşəyinin çox güman ki, Wuhan-dakı laboratoriyalardan birinin olduğunu qiymətləndirir”.
Sözügedən qanun layihəsi 2021-ci ildə Senatda da qəbul edilmişdi, lakin Nümayəndələr Palatasında gündəmdə deyildi. Martın 2-də Senatda yenidən qəbul edilən qanun layihəsi bu dəfə Nümayəndələr Palatasından da keçərək prezident Co Baydenin masasına keçib.
