Parisdə maaşların artırılması tələbi ilə nümayiş keçirilib

 Fransanın paytaxtı Parisdə müxtəlif peşə sahibləri əmək haqlarının artırılması tələbi ilə nümayiş keçirib.

Busaat.az xəbər verir ki, ölkənin ən böyük ittifaqı olan CGT və Paris ətrafında ictimai nəqliyyatdan məsul qurum olan RATP işçilərini təmsil edən müxtəlif həmkarlar ittifaqları tətil elan edərək iş şəraitinin yaxşılaşdırılmasını və maaşların artırılmasını tələb edib.

Bu çərçivədə Fransa Tələbələri Milli Birliyin (UNEF) üzvləri Parisdə keçirilən etiraz aksiyasına qatılıb.

Gərgin təhlükəsizlik tədbirlərinin görüldüyü nümayiş Cümhuriyyət meydanından başlayıb Opera meydanında yekunlaşıb.

RATP işçisi Nuranın Anadolu Agentliyinə verdiyi məlumata görə, iş şəraitinin yaxşılaşdırılması tələbi ilə keçirilən nümayişdə müxtəlif peşə sahibləri iştirak edib. Digər tərəfdən RATP-dəki tətil səbəbiylə Paris və ətrafında şəhərətrafı qatarlarda, metro və avtobus xidmətlərində fasilələr gün ərzində davam edib.

Nümayişçilərdən Youri adlı 21 yaşlı tələbə əsas tələblərinin inflyasiyaya qarşı maaş artımı olduğunu və pensiya yaşının aşağı salınmasını istədiyini bildirib. Youri Fransanın üzləşdiyi enerji böhranını və artan benzin qiymətlərini xatırladaraq inflyasiyanın bütün sektorlara yayıldığını müşahidə etdiyini ifadə edib.

Busaat.az