ABŞ Müdafiə Nazirliyinin (Pentaqon) sözçünün müavini Sabrina Sinq Suriyadakı hadisələri izlədiklərini bildirib və gərginliyin azaldılmasına çağırıb.
Busaat.az xəbər verir ki, Sinq gündəlik mətbuat konfransında Türkiyənin PKK/YPG terror təşkilatına qarşı Pəncə-Qılınc əməliyyatı və PKK/YPG-nin hücumları ilə bağlı sualları cavablandırıb.
“Biz meydanda baş verənləri izləməyə davam edirik. Nazirlik olaraq bütün tərəfləri gərginliyi azaltmağa çağırırıq” – deyə, Sinq deyib.
Sinq ABŞ-ın regionda varlığı məsələsinə toxunub: “Keçən həftə Türkiyəyə hücum edildi, sonra İraq və Suriyada Türkiyənin hava hücumları gördük. Biz tərəfləri bütün münaqişələri dayandırmağa çağırırıq. Bilirsiniz, oradakı ABŞ ordusunun məqsədi İŞİD-i daimi olaraq məğlub etməkdir. İndiki məqamda bu hücumlar bizi əsas məqsəddən yayındırır və beynəlxalq koalisiyanın İŞİD-i məğlub etməkdə qazandığı uğurları riskə atır”.
Digər tərəfdən, Ağ Ev Milli Təhlükəsizlik Şurasının Strateji Kommunikasiyalar Direktoru Con Kirbi bu ifadələri işlədib: “Türkiyə, xüsusən də cənubunda qanuni terror təhlükəsindən əziyyət çəkməyə davam edir. Təbii ki, onların özlərini və vətəndaşlarını müdafiə etmək hüququ var”.
Busaat.az