Bir qrup naməlum şübhəli şəxs Ekvador prezidentliyinə namizəd Fernando Villavicencionun seçkiqabağı çıxışından sonra ona sui-qəsd edib.
Busaat.az xəbər verir ki, bu barədə El Universo qəzeti məlumat yayıb.
Ekvador prezidenti Guillermo Lasso daha sonra Villavicencionun ölümünü təsdiqləyib. O, bildirib ki, ölkənin Təhlükəsizlik Şurası bu məsələ ilə bağlı qısa müddət ərzində iclas keçirəcək.
“Onun xatirəsinə və mübarizəsinə görə sizi əmin edirəm ki, bu cinayət cəzasız qalmayacaq”, – Lasso sosial media hesabında yazıb.
El Universo qəzeti xəbər verir ki, prezidentliyə namizəd Villavicencio başından üç güllə yarası alaraq ölüb. Məlumata görə, sui-qəsdi həyata keçirən qrup 7 nəfərdən ibarət olub.
Qeyd edək ki, Ekvadorda növbədənkənar prezident və parlament seçkiləri avqustun 20-nə təyin edilmişdi. Sorğulara görə, Villavicencio prezident seçkilərində digər namizədlər arasında 4-5-ci yerdə qərarlaşıb.
