Putinin Çinə səfərinin tarixi hələ razılaşdırılmayıb – Kreml

Rusiya prezidenti Vladimir Putinin Çinə səfərinin vaxtı hazırda tərəflər tərəfindən razılaşdırılır.

Busaat.az xəbər verir ki, bu barədə Kremlin sözçüsü Dmitri Peskov TASS-a bildirib.

“Dəvət var, onun müddəti və digər detallar sonra razılaşdırılacaq”, – Peskov deyib.

Çin prezidenti Si Tsipin bir müddət əvvəl bildirmişdi ki, o, Putini ilin sonunda Çinə səfərə dəvət edib, çünki bu il Çin Beynəlxalq Əməkdaşlıq üçün “Bir kəmər, bir yol” üçüncü beynəlxalq forumuna (BRFIC) ev sahibliyi edəcək.

2017-ci ilin mayında Pekində baş tutan ilk “Bir kəmər, bir yol” Forumu Çin, Rusiya və 28 Avrasiya, Afrika və Latın Amerikası ölkələrinin yüksək səviyyəli rəsmilərini bir araya gətirib. İkinci forum 2019-cu ilin aprelində yenidən Çində keçirilib.

Rusiya Təhlükəsizlik Şurasının katibi Nikolay Patruşev bildirib ki, Moskva Pekinin Vladimir Putinə tədbirin fəxri qonağı kimi “Bir kəmər, bir yol” forumunda çıxış etmək üçün göndərdiyi dəvəti yüksək qiymətləndirir.

Busaat.az