İsveçrə hökuməti ABŞ-la F-35A tipli döyüş təyyarələri almaq üçün müqavilə imzalayıb.
Busaat.az xəbər verir ki, bu barədə məlumatlar İsveçrə hökuməti tərəfindən təsdiqlənib.
Məlumata görə, İsveçrə Federal Silahlanma İdarəsi artıq 36 ədəd F-35A qırıcı təyyarəsi almaq üçün ABŞ tərəfi ilə razılıq əldə edib.
2027-ci ildə başlayacaq F-35A tədarükü 2030-cu ilə qədər davam edəcək və F-35A İsveçrə Hərbi Hava Qüvvələrində mövcud F/A-18 Hornets və F-5 Tigers təyyarələrini əvəz edəcək.
Ancaq İsveçrə hökumətinin bu qərarı ölkədə birmənalı qarşılanmayıb. Referendum prosesini gözləmədən müqavilə imzalanması tənqidlərə səbəb olub. Müxalifət partiyaları referendumun nəticələrini gözləmədən F-35A müqaviləsinin imzalanmasının qanunsuz olduğunu iddia edərkən, İsveçrə Parlamentinin Təftiş Komissiyası razılaşmanın “narahatedici” olduğunu, lakin “qanunlara zidd olmadığını” bildirib.
Qeyd edək ki, 2020-ci ildə İsveçrədə keçirilən referendumda ordunun modernləşdirilməsi təklifi səs çoxluğu ilə qəbul edilib. Ancaq modernləşmə çərçivəsində döyüş materiallarının hansı ölkələrdən alınacağı referendum mətnində göstərilməyib.
Referendumdan sonra hökumət ABŞ-dan 36 ədəd F-35A almaq üçün 6 milyard İsveçrə frankı (6,1 milyard dollar) dəyərində ilkin müqavilə imzalayıb. Bundan sonra müxalifət partiyaları, 2020-ci il referendumunda F-35A-ların alınacağına dair hər hansı bir şərtin olmadığı səbəbiylə məsələnin ictimai səsverməyə çıxarılmasını tələb edib. “F-35-ləri dayandırın” kampaniyası çərçivəsində imza toplayan müxalifət mayın 27-də referendum üçün lazım olan 100 min imzaya çatdıqlarını açıqlayıb.
Busaat.az
