Qonşuda Avropa həyacanı: Gürcüstan Aİ-dən namizəd statusunu gözləyir

Gürcüstan prezidenti Salome Zurabişvili Avropa İttifaqının (Aİ) 2023-cü ilin sonuna qədər ölkəsinə namizəd statusu verəcəyinə əmin olduğunu bildirib.

Busaat.az xəbər verir ki, Gürcüstan prezidenti Zurabişvili Avropa Parlamenti Baş Assambleyasının Brüsseldə işə başlayan 2 günlük sessiyaları çərçivəsində deputatlar qarşısında çıxış edib:

“Avropaya səyahətimizin bu həlledici dövründə mən Gürcüstanın yerli və beynəlxalq çağırışların öhdəsindən gəlməsini və tamhüquqlu Avropa inteqrasiyası yoluna möhkəm qədəm qoymasını istərdim. Bunun yalnız bir yolu var, ilin sonuna qədər Gürcüstana Aİ-yə namizəd ölkə statusu verilməsini təmin etmək. Mən buna əminəm”.

Zurabişvilinin avropalı parlamentarilərə müraciəti Moldovanın paytaxtı Kişinyovda Avropa ölkələrinin liderləri və Aİ təsisatlarının rəhbərlərini bir araya gətirəcək Avropa Siyasi Birliyinin (AST) iclasından bir gün əvvələ təsadüf edib.

Ukraynadakı müharibədən sonra Gürcüstan bu ölkə və Moldova ilə birlikdə Aİ-yə üzvlük üçün müraciət edib. Ukrayna və Moldovanın müraciətləri namizəd ölkə statusunun verilməsi ilə nəticələnsə də, Gürcüstanın vəziyyətinin sonradan yenidən qiymətləndirilə biləcəyi bildirilib.

Busaat.az