Rosatom prezidenti və MAQATE-nin direktoru Qrossi Zaporojye AES-in vəziyyətini müzakirə ediblər

Rosatom prezidenti Aleksandr Lixaçev Moskvada Beynəlxalq Atom Enerjisi Agentliyinin (MAQATE) direktoru Rafael Mariano Qrossi ilə Zaporojye Atom Elektrik Stansiyası (AES) ilə bağlı vəziyyəti müzakirə edib.

Busaat.az xəbər verir ki, bu barədə Rosatomdan açıqlama verilib.

Bəyanatda bildirilib ki, görüş zamanı Zaporojye Atom Elektrik Stansiyasının ətrafında təhlükəsiz zonanın yaradılması məsələsi də müzakirə olunub və tərəflərin bu məsələyə yanaşmaları oxşar olub.

Açıqlamada, stansiyanın təhlükəsizliyi ilə bağlı fəaliyyət göstərən MAQATE missiyası ilə də məsləhətləşildiyi bildirilib və tərəflərin ən qısa zamanda təhlükəsiz zonanın yaradılması da daxil olmaqla əməkdaşlığı davam etdirmək barədə razılığa gəldiyi qeyd edilib.

Avropanın ən böyük atom elektrik stansiyası

Ukraynanın cənub-şərqindəki Zaporojye Atom Elektrik Stansiyası Avropanın ən böyük atom elektrik stansiyasıdır.
Elektrik stansiyası martın 4-də ruslar tərəfindən ələ keçirilib. Hazırda Rusiya ordusunun nəzarətində olan zavodun ətrafında artilleriya hücumları davam edərkən, Ukrayna və Rusiya hücumlarda bir-birini ittiham edir.

Busaat.az