Rus hakerin başına 10 milyon dollar mükafat qoyuldu

“Rusiya kibercinayətkarlar üçün təhlükəsiz sığınacaqdır və zərərli proqram aktorlarının ABŞ, onun tərəfdaşları və müttəfiqlərinə qarşı zərərli kiber əməliyyatları sərbəst şəkildə həyata keçirdikləri mühit təmin edir”.

Busaat.az xəbər verir ki, bu barədə ABŞ Dövlət Departamentinin sözçüsü Mett Miller yazılı açıqlama verib.

Miller qeyd edib ki, Dövlət Departamentinin Beynəlxalq Mütəşəkkil Cinayətkarlıqla Mübarizə üzrə Mükafat Proqramı çərçivəsində Rusiya vətəndaşı Mixail Pavloviç Matveyevin beynəlxalq mütəşəkkil cinayətkarlıqda saxlanmasına və ya məhkum edilməsinə dəstək olan məlumatları təqdim edənlərə 10 milyon dollara qədər mükafat təklif edilir.

Ədliyyə Nazirliyinin Vaşinqton və Nyu-Cersi ştatlarında iki məhkəmədə Matveyevə qarşı iddia qaldırdığını bildirən Miller, rus hakerin ABŞ Maliyyə Nazirliyi tərəfindən sanksiya siyahısına salındığını qeyd edib.

“Biz bu addımları Matveyevin ABŞ-də və bütün dünyada Amerika hüquq-mühafizə orqanlarına, bizneslərinə və kritik infrastrukturlarına qarşı kiberhücum insidentlərindəki roluna görə edirik”, – Mett Miller deyib.

Busaat.az