Rusiya qüvvələrinin Ukraynanın paytaxtı Kiyevə raket və pilotsuz uçuş aparatları (PUA) ilə hücumlar təşkil etdiyi bildirilib. İlkin məlumata görə, onların əksəriyyəti havada məhv edilib.
Busaat.az xəbər verir ki, Kiyev Şəhər Hərbi İdarəsindən verilən yazılı açıqlamada Rusiya ordusunun may ayında Kiyevə 8-ci dəfə hava hücumu təşkil etdiyi bildirilib.
Rusiya qüvvələrinin bu gün səhər saatlarında Kiyevə doğru intensiv PUA və raket hücumları həyata keçirdiyi qeyd edilən açıqlamada deyilir: “İlkin məlumatlara görə, Kiyev hava məkanında düşmən hədəflərinin böyük əksəriyyəti aşkar edilərək məhv edilib. Raketlərin sayı və növü ilə bağlı məlumatlar tezliklə Hərbi Hava Qüvvələri tərəfindən açıqlanacaq”.
“Telegram” hesabında açıqlama verən Kiyev meri Vitali Kliçko partlayışların şəhərə Rusiya qüvvələrinin hücumları nəticəsində baş verdiyini bildirib. Raketlərin və PUA hissələrinin Solomyansk, Şevçenkivski, Darnitski və Obolonski rayonlarına düşdüyünü bildirən Kliçko, ilkin məlumata görə, Solomyanskda 3 nəfərin yaralandığını, Darnitskidə isə 2 mülki avtomobilin yandırıldığını qeyd edib.
Ukraynanın müxtəlif bölgələrində hava hücumu xəbərdarlığı səslənməyə davam edib.
Busaat.az
