Biz beynəlxalq münasibətlərin hazırkı mərhələsini yeni “soyuq müharibə” kimi müəyyən etmirik.
Busaat.az xəbər verir ki, bunu Rusiyanın xarici işlər naziri Sergey Lavrov İndoneziyanın “Kompas” qəzetinə müsahibəsində bildirib.
“Söhbət başqadır və fərqli bir şeydən, yəni çoxqütblü beynəlxalq nizamın formalaşmasından gedir. Bu, obyektiv prosesdir. Hər kəs görür ki, yeni Qlobal mənalı qərar qəbuletmə mərkəzləri Avrasiya, Asiya-Sakit Okean regionu, Yaxın Şərq, Afrika və Latın Amerikasında öz mövqelərini gücləndirirlər”, – Lavrov deyib.
Onun sözlərinə görə, belə mərkəzləri təşkil edən ölkələr və birliklər “milli maraqlar, müstəqillik, suverenlik, mədəni və sivilizasiya kimliyi və beynəlxalq əməkdaşlıq kimi dəyərləri təbliğ edirlər”.
Lavrov qeyd edib ki, ABŞ-nin rəhbərlik etdiyi kollektiv Qərb öz hegemonluğunu qorumaq üçün bu prosesləri ləngitməyə çalışır, bununla da qlobal ərzaq və enerji təhlükəsizliyini pozur və inkişaf etməkdə olan ölkələrin işini çətinləşdirir.
“Beynəlxalq inkişafın təşviqinə, o cümlədən ən çox ehtiyacı olan ölkələrə yardıma xərclənə biləcək böyük məbləğdə pullar Ukraynaya verilən minlərlə ton hərbi texnika və sursat şəklində yandırılır”, – diplomat vurğulayıb.
Busaat.az
