Rusiya MN: "Şükrü Okan" yük gəmisi Ukraynanın İzmail limanından Rumıniyaya yola düşüb"

Avqustun 13-də Rusiya hərbçiləri tərəfindən yoxlanılan “Şükrü Okan” ümumi yük gəmisi Ukraynanın İzmail limanından çıxaraq Qara dənizə daxil olub.

Busaat.az xəbər verir ki, bu barədə TASS məlumat yayıb.

Gəmilərin hərəkətini izləyən onlayn xidmətlərə görə, “Şükrü Okan” Rumıniyanın Konstansa limanına doğru hərəkət edir. Onun oraya çatması 9 saata gözlənilir. “Şükrü Okan” avqustun 20-dən İzmaildədir. Gəminin profilində qeyd olunur ki, onun su çəkmə qabiliyyəti hazırda maksimum 5,4 metrdən fərqli olaraq 3,7 metrdir.

Rusiya Müdafiə Nazirliyi bildirib ki, avqustun 13-də Rusiya Hərbi Dəniz Qüvvələrinə məxsus “Vasili Bıkov” gəmisinin heyəti Ukraynanın İzmail limanına gedərkən Qara dənizdə Palau bayraqlı “Şükrü Okan” gəmisini saxlayıb. Nazirlik qeyd edib ki, təftiş qrupu beynəlxalq qaydalara uyğun olaraq peşəkar iş görüb. Yoxlama qadağan olunmuş yükün olub-olmadığını öyrənmək məqsədilə aparılıb.

Gəmi sahibi şirkətin nümayəndəsinin CNN-ə verdiyi məlumata görə, “Şükrü Okan”ın kapitanı hər hansı bir zərərin olmadığını və heç bir yük gəmisinin ələ keçirilmədiyini bildirən kağıza imza atıb.

Qeyd edək ki, sözgedən gəmi türk sahibinə məxsusdur.