Dövlət Dumasının MDB işləri, Avrasiya inteqrasiyası və həmyerlilərlə əlaqə komitəsi sədrinin birinci müavini, deputat Konstantin Zatulin NSN-ə verdiyi müsahibəsində “Rusiya Dağlıq Qarabağdakı vəziyyətin sonrakı inkişafına necə təsir edə bilər?” sualına cavab verib.
Busaat.az xəbər verir ki, bu haqda məlumatı Rusiya mediası yayıb.
Zatulinə görə, hərbi intiqam almaq üçün bölgədəki barışı pozan Azərbaycan və Türkiyə idi, bu səbəbdən postsovet məkanında lider dövlətin özünü xatırlamağın lazım olduğunu düşünür.
Deputat Moskvanın necə hərəkət edəcəyinə əmin olmadığını etiraf edib, lakin Ermənistanda desant əməliyyatı da daxil olmaqla təklif olunan bir neçə variantın adını çəkib.
“Ermənistanın hərbi potensialını gücləndirməliyik, KTMT-yə müraciət etməliyik, Dağlıq Qarabağda deyil, Ermənistan ərazilərində desant əməliyyatı həyata keçirməliyik, hava blokadasını açmalıyıq. Lazım gələrsə, Gürcüstana aydın şəkildə izah etməliyik ki, hərbi qüvvələrin və vasitələrin öz hava məkanından Ermənistana göndəriləcəyini sakitcə qəbul etməlidir. Bu qərar məcburi olmalıdır, çünki Rusiya, Gürcüstan və digər ölkələr Qafqaza silahlıların yayılmasından narahatdır. Bölgədə erməni əhalisinin böyük bir kütləsi üçün təhlükə var. Fəaliyyətə başlamalıyıq” deyib Zatulin.
Bundan əlavə, deputat Ermənistanın Baş naziri Nikol Paşinyanın münaqişənin hələ diplomatik həll yolu olmadığına dair fikirləri ilə razılaşıb. O, Rusiyanın bütün səylərinə baxmayaraq danışıqlar prosesinin əslində getmədiyindən təəssüfləndiyini də bildirib.
“Buna görə də Paşinyanın dediklərini qismən təsdiq edə bilərik. <…> İndi görürük ki, Azərbaycan tərəfi mövqeyini dəyişir və danışıqların tərəfdarıdır. Eyni zamanda, hücuma davam edir”. Zatulin yekunlaşdırıb.
