Rusiya sabahdan xarici vətəndaşlara elektron vizaların verilməsinə başlayır
Xarici vətəndaşlar sabahda etibarən Rusiyaya universal elektron birdəfəlik giriş vizası ala biləcəklər.
Busaat.az xəbər verir ki, elektron viza Avropa ölkələri də daxil olmaqla 55 ölkənin vətəndaşlarına şamil ediləcək.
Rusiya Xarici İşlər Nazirliyi bildirib ki, viza Rusiyaya turistik, işgüzar, humanitar və qonaq səfərləri üçün daxil olmağa imkan verir. Elektron viza birdəfəlikdir və 16 gün müddətində etibarlıdır.
Əcnəbilər elektron viza üçün Rusiya Xarici İşlər Nazirliyinin xüsusi saytında (electronic-visa.kdmid.ru) və ya mobil proqram vasitəsilə müraciət edə bilərlər. Müraciət etmək üçün pasport, tibbi sığorta, pasport şəkli və tam üz şəkli tələb olunur. Viza ərizələri Rusiyaya planlaşdırılan giriş tarixindən ən geci dörd gün əvvəl təqdim edilməlidir.
Rusiya İqtisadi İnkişaf Nazirliyinin məlumatına görə, 2023-cü ilin sonuna turist axını elektron vizanın tətbiqi sayəsində 10 milyon nəfərə qədər arta bilər. 2020-ci ildə Rusiya 52 ölkənin xarici vətəndaşlarına 2021-ci ildən elektron viza üçün müraciət etməyə icazə verən qanun qəbul edib. Lakin pandemiya səbəbindən qanunun icrası təxirə salınıb.
Busaat.az
