Rusiya, Türkiyə, Suriya və İran XİN rəhbərlərinin görüşü təxirə salındı

Rusiya, Türkiyə, Suriya və İran xarici işlər nazirlərinin gözlənilən görüşünün may ayına təxirə salındığını bildirilib.

Busaat.az xəbər verir ki, bu barədə Rusiyanın Dəməşqdəki səfiri Aleksandr Yefimov məlumat yayıb.

Yefimov Suriyada nəşr olunan “Əl Vətən” qəzetinə müsahibəsində Rusiya, Türkiyə, Suriya və İran xarici işlər nazirlərinin görüşünün vaxtı ilə bağlı deyib: “Bazar ertəsi keçirilməsi planlaşdırılan görüş mayın əvvəlinə təxirə salındı”.

Yefimov görüşün təxirə salınmasının səbəbi ilə bağlı açıqlama verməsə də, xarici işlər nazirlərinin görüşündə müsbət nəticə əldə etmək üçün tərəflər arasında məsləhətləşmələrin davam etdiyini bildirib.

Rusiyanın bu dördtərəfli görüşün reallaşması üçün səylərini davam etdirəcəyini qeyd edən rusiyalı səfir onu da əlavə edib ki, bir və ya bir neçə görüşlə bütün problemləri həll etmək mümkün deyil.

Sputnik-in xəbərinə görə isə, Yefimov deyib: “Bu, uzun yoldur, amma biz bu istiqamətdə addım-addım irəliləyirik”.

Qeyd edək ki, Rusiya, Türkiyə, Suriya və İranın xarici işlər nazirlərini bir araya gətirəcək görüşə hazırlıq məqsədilə bu dörd ölkənin xarici işlər nazirlərinin müavinləri ötən həftələrdə Moskvada məsləhətləşmələr aparıblar. Türkiyə-Suriya münasibətlərinin normallaşması dörd ölkənin gündəmindədir.

Busaat.az